قصيدة جزلية بعنوان ” تشهيت ” جديد الشاعر عبد الله الرخا

askamo24
2021-02-20T14:14:33+00:00
الرئيسيةثقافة وفن
20 فبراير 2021
قصيدة جزلية بعنوان ” تشهيت ” جديد الشاعر عبد الله الرخا

تشهيت نخلي عتبة الحباب

ونزيد خلفة مع الباب
قبل ما يتكحلوا عيني برماد الحكرة
والغدر

تشهيت غير نسمع واحد الهضرة
ونطير كيف الحمق
فوق سحابة كحلة زحلة
ما يشوفني حد

تشهيت نكون نجمة
تضوي غير خيالي
وتضوي عظيمات كلامي
والعمر

تشهيت ننسى ذكريات الماضي
وأنسى أيامي لي دازت بالسيف
وصابرة على هاذ العقل
وعلى هبالي

تشهيت نكون براني على بلادي
نولي غير ضيف
نسمع الهضرة ما نزيد
ما نقص

تشهيت ناخذ حقي بيدي
واخا الحق صعيب وغالي
واخا تكون شاهد على على عمرك
والقبر

تشهيت نعاود نشعل
الشمعة لي ذابت
بين غابة العجب هذا شحال
وبين صهد الحاجب

تشهيت نكون وردة
تبقى ديما مفتحة
على جنان بلعمان
لي مغروس فهاذ الأرض

تشهيت نغسل دموعي
فبحر عريض وغارق
ما عندو مرياية
ما عندو ݣلب

تشهيت نفيق من جديد
ونشارك فعراضة مع هاذ الضمير
قبل ما ينسى المبدأ
أولا يركع

تشهيت نسافر بعيد
نغطس غطسة سمينة
حتى يتسرح جوفي
ولا ينقى

تشهيت نبني حيط بلا حجر
ونبعد على شوفة بنادم
شوفة الحكرة والعين بالعين
والسن بالسن

تشهيت غير ننعس على حجر رطب
ما يدير صداع ما يدير حس
ونضوي وجهي نشوفو
وعليه بوحدي أنا لي نحن

تشهيت نحل بيبان روحي
ونصوط على جمر العافية
لي فهاذ الجوف والݣلب
ولي فروحي

تشهيت نغسل الوسخ لي فجنابي
الحروف لي الملاوطة بين فراسي
والوقت الغاملة فتنهيدتي
بلا قياس

تشهيت نلعب الغميضة
وترجع غير شوي د الصغر
ونتفكر زهري لي ضاع
ومشى بين الصبر

تشهيت وتشهيت
تشهيت نفرح شي مرة
ونحس بيا بزاااف
شلا إحساس أو ما نعاند
تشهيت…

عبد الله الرخا
أيت سادن تالوين 19 فبراير 2021

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.