الرئيسية وطنيات مول الطيارة في حوار شيق

مول الطيارة في حوار شيق

كتبه كتب في 2 سبتمبر 2012 - 00:58

محمد نحمد، صانع طائرة بإمكانيات متواضعة في برشيد، يحكي قصة صنعه لطائرة بإمكانيات متواضعة جدا، وغير بشنيول وبوسط ومون. كما كشف أنه ينتظر الترخيص من السلطات لتجريب النموذج اللي صنعه، وقال: “الطائرة اللي صوبت غير نموذج وخاص إمكانيات باش طير مائة في المائة”.

واش نسميوك السي محمد ولا نسميوك مول الطيارة؟

(يضحك) بحال بحال اللي بغيتو.

قول لينا كيفاش قصة هاد الطيارة اللي صاوبتي؟

هاد الطيارة قصتها أنها كانت حلم ويالاه تحقق، منذ الطفولة كنت كنفكر كيفاش كتصنع الطائرة وكيفاش كتطير، وعلاش هاد الطائرة عندها واحد الوزن معين وكتطير، وبقيت كنبحث ودرت دراسة وبحث في الأنترنت وتفرجت في الأفلام الوثائقية اللي كتهضر على الطائرات، وكنت كنمشي لمطار محمد الخامس، حيت قريب منا شوية، باش نشوف كيفاش كيقلعو الطائرات وكيفاش كتحرك. وصافي الفكرة بقيت كنمي فيها وكنبحث حتى لدابا عاد تمكنت أنني نطبقها.

كلشي كيسول واش الطيارة اللي صوبتي كتطير ولا لا؟

هاد الطيارة اللي صوبت كملات في الصنع، وبغيت ندير طيران تجريبي لكن خاص السلطات المحلية تعطيني ترخيص، حيت أي تحليق خاص يكون في علم السلطات.

والسلطات آش قالت ليك؟

حاليا باقي المسألة محطوطة في العمالة، وكنتسنى في الرد.

مع هاد المشاكل اللي وقعت ليك مع الطيارة واقيلة أنت اللي ممكن تنطايق عليه ديك الأغنية مالي أنا طيارة دارتها بيا. واش تحلو المشاكل ديالك ولا مازال؟

(يضحك) لحد الآن المشاكل باقا، ومازال ما درنا والو اللي ممكن يتذكر، خاص ورش لصناعة طائرة، لأن التي صنعت صنعتها بإمكانيات جد بسيطة، صوبتها غير بشنيول وبوسط ومون، دابا خاص إمكانيات كثيرة، وخاص أرضية إقلاع، وخاصني معدات لاستبدال مكونات الطائرة، وخاص حويج أخرى اللي ما توفراتش ليا. الطائرة اللي صوبت غير نموذج وخاص إمكانيات باش تطير مائة في المائة.

واش كتعتابر راسك مخترع ولا مصمم؟ حيت الطيارة اللي صوبتي هي من نوع كري كري المعروفة؟

بالنسبة للاختراع كتكون لشي حاجة عمرها ما كانت في العالم، أما بالنسبة لهاد الشي اللي عندي هو صنع، هاد الشي اللي كنظن أنا، هي شي حاجة كاينة غير صنعنا بحالها. المهم في الأمر أنها صنعت في منطقة جد نائية بأشياء جد بسيطة. وبغيت نوجه رسالة من هذا المنبر، هي أنه إنسان في منطقة نائية وبهاد الإمكانيات يلا توفرات ليه الإمكانيات يقدر يوصل لشي حاجة مهمة.

محمد محلا/ كيفاش

مشاركة