مدير مهرجان بني عمار زرهون : المغاربة خاص يخدمو بحال الحمير + تسجيل صوتي

انطلق فصل المهرجانات، وانطلق معه واحد من أغرب المهرجانات في المغرب، مهرجان بني عمار زرهون، الذي يندرج في برنامجه مسابقة لسباق الحمير، وعلى الخصوص مسابقة لأجمل حمار وحمارة. هذا الكائن الذي قال عنه الأستاذ عبد الهادي التازي، عضو أكاديمية المملكة، في الدورة السابقة للمهرجان، إنه يجب التحسيس بمزاياه كمخلوق يستحق منا كل التقدير.
محمد بلمو، مدير مهرجان بني عمار زرهون، وفي حوار على برنامج “كيفاش” على ميد راديو، اليوم الجمعة (31 ماي)، قال إن الحمار “ما كيغش وما كيكدبش وما كيسرقش، كيخدم كود، وحنا المغاربة خاص نخدمو بحال الحمير بجد ومثابرة”. كما شرح في الحوار طرق اختيار جميل الحمير.

سي محمد منين نبداو فين نساليو؟؟
اللي بغيتي واللي بغات ميد راديو.

واحد المهرجان غادي تشرفو عليه، مهرجان الحمير في زرهون. كيفاش قصة هاد المهرجان؟
هو هذا ماشي عاد غادي نشرفو عليه، سميتو مهرجان بني عمار زرهون، غادي ننضمو هاد العام الدورة 11 وبديناه قدنا قد موازين. السنة الأولى نظمنا فيها سباق السرعة بالحمير، لأن حنا ملي كنا صغار كنا كنتسابقو بشكل تلقائي ملي كنا نمشي نجيبو الما، وحاولنا في المهرجان إدماج هذه السباقات في المهرجان، ولكن من بعد طورنا الأمر وولينا كنديرو مسابقة أجمل حمار وحمارة.

دابا آشنو هوما المواصفات ديال الحمار أو الحمارة أو الدحشة أو الدحش اللي يمكن يربح؟ واش حتى هوما خاصهم الأخلاق والجمال وهاد المسائل؟
طبعا. كاين مواصفات الجمال، وكيكونو أطباء بيطرين وجمعيات الرفق بالحيوان وجمعيات المحافظة على الطبيعة، وفيه مثقفين وشعراء اللي كيدوزو قدامهم المتنافسين وكيعرضو الحمير ديالهم بالزينة ديالهم… وأصحابهم، اللي أبناء فلاحين فقراء وحمالين، كتخصص ليهم جوائز مالية وعينية.

دابا ملي نقولو حمار ما نبقاوش نقولو حاشاكم، حيت ولى عندو مهرجان؟
لا أبدا، ماشي حيت ولا عندو مهرجان. هذا راه ظلم تاريخي اللي كنلصقوه لهذا الكائن اللي كان دائما في خدمة الإنسان، حنا حيت أولاد منطقة جبلية وكنعرفو قيمتو أكثر، راه مدينة مولاي علي زرهون هو اللي بناها، ما يمكنش شي حاجة تدخل للمدينة أو تخرج إلا على ظهر هذا الحمار، وعوض ما نبخسو هاد الحمار ونردوه سبة بين الناس خاص نقدروه وخاصنا ناخدو رسالة من عندو، الحمار ما كيغش ما كيكدبش وما كيسرقش كيخدم كود وحنا المغاربة خاص يخدمو بحال الحمير، بجد ومثابرة.

واش الحمار مربوح عندو شي حظوظ باش يحافظ على اللقب؟
طبعا عندو حظ باش يحافظ على اللقب يلا ما كانش هناك مفاجئات، مع الدورات الشباب في المنطقة كيستعدو بكري للمنافسة وكل عام كتكون المنافسة قوية، وهو عندو حظوظ بنسبة كبيرة باش يحافظ على لقب أجمل حمار.

محمد محلا