خليني نكون شاهد
على شمعة العمر
على حماق هاذ الصبر
وعلى حرب ليلة الغدر
*
خليني نطفي ذيك الشمعة،
الراكدة فكفوف الليل
ونكون صورة بلا كادر
مخبي فذاك الحلق
*
خليني نكوني وردة منورة
كركاز وبلعان أحمر
نصفي گلبي بالغيس الأخضر
ونطوي صفحة بوحي فالجمر
*
خليني نذوب فالماء مع السكر
ونجاوب راسي بوحدي
بلا خوف،بلا كلمة تهيج جواي
وتوقف لي فالجوف حجر
*
خليني نهز گلبي ونطير بلا جناح
نعاود ليه شكون حنا
وشكون هاز هاذ الموت والبحر
باش يعاود يخلط أوراق الفجر
*
خليني ندفن خاطري فغابة الحكرة
نحط هاذ الرجل بلا ما نشوف
ونكتب حياتي بلا ورقة بلا قلم
ونرحل على هاذ الحرب بعيد
*
خليني نكون نجمة نبان غير بالليل
ولا کمرة نطل عليك مرة مرة
ونطل على الشمعة لي ملاوطة
بين الحباب تذوب دمعة دمعة
*
خليني نغرس بين لساني كلمة
نخليها تسَرَّح حلقي حتى يحنْ
بها نطلع تنهيدتي من ذيك الشمعة
ومن گلب گاع الصحاب ومن لهيه
*
خليني نكتبك قصة رومانسية
تعاودي عل الدنيا وعلى شنو بيا
نحلف بحلوفي غيتحل لساني
ونگول ليك ونعاود الهضرة
*
خليني نطيح فأرضك قطرة قطرة
بها تنبت الحياة ويتزادني فالعمر
بحالك أنت مراية وعقل
ونكونو واحد
*
خليني نحلم بعقلي
ونوزنك بميزان الوقت
ونشوف أش فراس الجمل
نشوف الكاس لي باغي يشربني
*
خليني نوريك حالنا مگواه
ها العار خليني نشعل هاذ الفتيلة
باش تشوفي مزيان آش واقع
وتعرفي فين حنا
*
خليني نغسلك بمداد روحي
وبمداد هاذ الگلب العاشق
ونكون معاك غواص فهاذ البحر
نشد بيديك ونزيد أنا وياك القدام
خطوة خطوة خليني.
عبد الله الرخا
أيت سادن أسايس تالوين 12 دجنبر 2020
